कारोबार संवाददाता
काठमाडौं, २८ माघ
अन्तर्राष्ट्रिय बजारमा आएको उतारचढाव र नेपालमा भएको भन्सारदर वृद्धिका कारण यो साता सुनचाँदीको भाउ सामान्य बढेको छ ।
नेपाल सुनचाँदी व्यवसायी संघका अनुसार नेपाली बजारमा यो साता सुनको मूल्य २ सय रुपैयाँ महँगो भएको छ । बजारमा आइतबार प्रतितोला ५४ हजार २ सय रुपैयाँ रहेको सुन क्रमशः बढ्दै बुधबार र बिहीबार ५४ हजार ५ सय रुपैयाँमा कारोबार भयो । शुक्रबार भने सामान्य घटेर ५४ हजार ४ सय कायम भएको छ ।
सरकारले मंगलबार सुनचाँदीको भन्सारदर बढाएपछि साताअन्त्यमा सुनचाँदीको भाउ थप महँगो भएको हो । सरकारले सुनमा ५ सय र चाँदीमा २ हजार २ सय भन्सारदर वृद्धि गरेको छ । यसपछि सुन १० ग्रामको १ हजार ५ सय रुपैयाँ र चाँदीको प्रतिकिलो ४ हजार ६ सय भन्सारदर पुगेको छ ।
भारतले सुनचाँदीको भन्सारदर बढाएपछि नेपालभन्दा महँगो भई त्यसतर्फ अबैध निकासी हुने आशंकामा सरकारले भन्सारदर समायोजन गरेको हो ।
यसैगरी आइतबार प्रतितोला १ हजार ५० रुपैयाँ रहेको चाँदीको भाउ क्रमशः बढ्दै शुक्रबार १ हजार १ सयमा कारोबार भयो । यो साता चाँदी ५० रुपैयाँ महँगो भएको संघले जनाएको छ ।
अन्तर्राष्ट्रिय सुन बजारमा आइतबार प्रतिऔंस १ हजार ७ सय २६ डलर रहेको सुनको भाउ क्रमशःबढ्दै शुक्रबार १ हजार ७ सय ३१ डलरको कायम भएको छ । यस्तै आइतबा प्रतिऔंस ३३.७५ डलरको कायम चाँदी सामान्य बढेर शुक्रबार ३३.८९ डलर कायम भएको छ ।

कारोबार संवाददाता
काठमाडौं, २८ माघ
लघुवित्त संस्थालाई इजाजत दिँदा सेवा नपुगेका क्षेत्रका लागि प्राथमिकता दिने नेपाल राष्ट्र बैंकका गभर्नर डा. युवराज खतिवडाले बताए । शुक्रबार मैद्रिक नीतिको अर्धवार्षिक समीक्षा गर्दै खतिवडाले एकै ठाउँमा सेवा प्रदान गर्ने धेरै लघुवित्त संस्थालाई  मर्जरमा जान उनले सुझाव दिए ।
केन्द्रीय बैंकले आर्थिक विकासका लागि ऊर्जा र कृषि क्षेत्रको लगानीमा विशेष ध्यान दिने जनाएको छ । कर्जा तथा ऊर्जा लगानी पर्याप्त भएमा कुल गार्हस्थ्य उत्पादनमा सो क्षेत्रको योगदान ४० देखि ४५ प्रतिशत रहन सक्ने भन्दै खतिवडाले बैंक तथा वित्तीय संस्थाको सो क्षेत्रमा लगानी ४ प्रतिशतभन्दा कम भएको बताए । बैंक तथा वित्तीय संस्थाले साना तथा मझौला उद्योग (एसएममी) का लागि कर्जा प्रवाह गरे रोजगार तथा उत्पादन बढ्ने बताउँदै खतिवडाले भने, “वित्तीय संकट आए पनि साना तथा मझौला उद्योगमा गरिएको लगानीले जोगाउँछ ।”
केन्द्रीय बैंकले चालू आर्थिक वर्षमा मूल्यवृद्धि ८ प्रतिशत हुने प्रक्षेपण गरेको छ । सरकारको पुँजीगत खर्च धेरै नभएकाले पनि मूल्यवृद्धि नियन्त्रणमा आउने केन्द्रीय बैंकले जनाएको छ । करिब ७८ अर्ब रुपैयाँ पुँजीगत खर्चमध्ये ६ महिनामा ९ अर्ब रुपैयाँ मात्र खर्च भएको छ ।
राष्ट्र बैंकले ब्याजदरमा विशेष ध्यान दिएको बताउँदै गर्भनर खतिवडाले कर्जा र निक्षेपबीचको ब्याजदरमा अझै उच्च फरक रहेको बताए । गत वर्ष तरलता अभावको समयमा बढेको ब्याजदर अवस्था सहज भए  पनि घट्न सकेको छैन । विशेषगरी कर्जाको ब्याजदर कम नभएका कारण लगानी बढ्न नसकेको हो ।
पछिल्लो समय बैंक तथा वित्तीय संस्थामा तरलता बढ्दै गएको ं राष्ट्र बैंकले जनाएको छ । आर्थिक वर्षको मध्यमा वित्तीय प्रणालीमा निक्षेपको ३३ प्रतिशत तरलता रहेको खतिवडाले बताए । वाणिज्य बैंकमा ३८ प्रतिशत तरल सम्पत्ति छ भने विकास बैंकमा ३४ र वित्त कम्पनीमा २८ प्रतिशत रहेको केन्द्रीय बैंकले जनाएको छ । बैंक तथा वित्तीय संस्थाले महँगोमा निक्षेप लिएकाले तत्कालै ब्याजदर कम हुन नसके हो ।
हालसम्म ६ जोडी बैंक तथा वित्तीय संस्थाले मर्जरको अनुमति पाइसकेको र ६ जोडी क्रममा रहेको खतिवडाले जानकारी दिए ।

कारोबार संवाददाता
काठमाडौं, २५ माघ
सेयर बजारमा नेपाल एसबीआई बैंकको १ करोड रुपैयाँभन्दा धेरैको सेयर किनबेच भएपछि समग्र कारोबारमा सामान्य सुधार आएको छ ।
बैंकको धेरै रकमको सेयर खरिद बिक्रीले समग्र नेपाल स्टक एक्सचेन्ज (नेप्से) कारोबारमा सुधार आएको छ । बुधबार बैंकको प्रतिकित्ता सेयर मूल्य २१ रुपैयाँसम्म घटेर किनबेच भएको छ । बैंकको एक कारोबारवाट १ करोड १२ लाख २८ हजार रुपैयाँबराबरको २८ हजार कित्ता सेयर खरिद बिक्री भएको छ ।
बैंकको सेयर थ्राइभ ब्रोकरेज हाउसको मध्यमवाट बलराम श्रेष्ठले बिक्री गरी अमिर श्रेष्ठले खरिद गरेको जानकारी बजार स्रोतले दिएको छ । सेयर खरिद र बिक्रीकर्ताले आपसी सहमति गरी कारोबार गर्न आएपछि किनबेच गराएको सम्बन्धित दलाल कम्पनीले जानकारी दिएको छ ।
कारोबारमा सामान्य सुधार भए पनि सेयर मूल्यमा आउने उतारचढावका अधारमा निर्धारण हुने नेप्से परिसूचक भने घट्ने क्रममा नै रह्यो । उत्पादनमूलक समूह ३१.१३ अंकको घटेपछि नेप्से परिसूचक ०.६४ अंकले घटेको हो ।
बुधबार युनिलिभर नेपालको प्रतिकित्ता सेयर मूल्य ६ सय रुपैयाँसम्म घटेपछि उत्पादनमूलक समूहमा ठूलो अंकको गिरावट आएको हो । सेयर बजार युनिलिभरको सेयरलाई ‘ब्लुचिप’ मानिन्छ । पछिल्लो समयमा कम्पनीका मजदुरले विभिन्न माग राखी आन्दोल सुरु गरेपछि हाल कम्पनी बन्द छ । कम्पनीमा देखिएको सो समस्याको असर सेयर मूल्यमा पनि देखिएको हो ।
बुधबार बैंकिङ ०.१४, अन्य १.१७ र बिमा ०.३७ अंकले बढेको भए पनि त्यसको सकारात्मक प्रभाव नेप्से परिसूचकमा पर्न सकेन । नेप्सेमा विकास बैंक १.३९, जलविद्युत्  २.३७ र वित्त समूह ०.२५  अंकले घटेका छन् । नेप्सेसँगै ‘क’ वर्गका कम्पनीको सेन्सेटिभ इन्ेडक्स पनि सामान्य अंकले घटेको छ ।
बुधवार सेयर बजारमा ८२ कम्पनीको कारोबार भएको छ । ती कम्पनीको १ हजार १ सय ७५ कारोबारबाट २ करोड ७२ लाख ११ हजार रुपैयाँबराबरको १ लाख १७ हजार ६ सय ५४ कित्ता सेयर किनबेच भएको छ ।
नेप्सेमा गुराँस लाइफ इन्स्योरेन्सको धेरै पटक सेयर कारोबार भएको थियो ।

]]> http://karobar.sabaiko.com/2012/02/08/%e0%a4%ac%e0%a5%88%e0%a4%82%e0%a4%95%e0%a4%bf%e0%a4%99-%e0%a4%b8%e0%a4%ae%e0%a5%82%e0%a4%b9%e0%a4%ae%e0%a4%be-%e0%a4%97%e0%a4%bf%e0%a4%b0%e0%a4%be%e0%a4%b5%e0%a4%9f%e0%a4%95%e0%a5%8b-%e0%a4%aa/feed/ 0